Një numër qytetesh franceze kanë vendosur orë policore gjatë natës për të rinjtë, pas një vale në rritje dhune të lidhur me trafikun e drogës.
Qyteti i fundit që zbatoi këtë masë është Nîmes, në jug të vendit, ku autoritetet synojnë të mbrojnë të miturit nën 16 vjeç nga “ekspozimi ndaj dhunës” dhe të “zbusin tensionet” në komunitet. Për të mbështetur masat, do të vendosen gjithashtu forca shtesë policore.
Në muajin e fundit, qyteti është përballur me disa të shtëna me armë – përfshirë një incident në mes të ditës – që lanë një të vdekur dhe disa të plagosur.
Së fundmi, trupi i një 19-vjeçari u gjet pjesërisht i djegur në periferi të Nîmes.
Ora policore, që është në fuqi nga ora 21:00 deri në 06:00, u shpall nga kryebashkiaku Jean-Paul Fournier, i cili e përshkroi situatën si “të padurueshme”, duke fajësuar bandat e drogës për krijimin e një “klime frike dhe terrori”, raporton BBC.
Zëvendëskryetari i bashkisë, Richard Schieven, theksoi se kjo masë synon të mbrojë jo vetëm të rinjtë që nuk janë të përfshirë në trafik, por edhe ata të moshës 12-13 vjeç që po shfrytëzohen nga rrjetet kriminale.
Edhe qytete të tjera kanë ndërmarrë masa të ngjashme. Béziers, rreth 120 kilometra në jugperëndim, ka zbatuar një shtetrrethim për fëmijët nën 13 vjeç që nga viti i kaluar, i cili është zgjeruar për të mbuluar fëmijët nën 15 vjeç në disa zona.
“Një 10-vjeçar që endet rrugëve në orën 2 të mëngjesit nuk është atje për asgjë tjetër përveç telasheve,” deklaroi kryebashkiaku Robert Ménard në vitin 2024.
Megjithatë, pavarësisht këtyre përpjekjeve, dhuna nuk është ndalur. Fundjavën e fundit, në Béziers, të rinj të maskuar sulmuan policinë me fishekzjarre pas një përleshjeje të organizuar.
Incidente të ngjashme janë raportuar edhe në qytetin e Limoges, ku shtetrrethimi për fëmijët nën 13 vjeç gjatë pushimeve verore nuk dha rezultat.
Kryebashkiaku Émile Roger Lombertie tha se masa ishte “e padobishme” dhe theksoi mungesën e burimeve për zbatimin efektiv të saj.
Këto ngjarje pasqyrojnë një trend shqetësues: dhuna e lidhur me drogën po përhapet përtej Marsejës – qyteti që historikisht ka qenë në qendër të luftërave mes bandave kriminale.
Sipas Ministrisë së Brendshme, vetëm në vitin 2024 janë regjistruar 110 të vdekur dhe mbi 300 të plagosur nga dhuna e trafikut të drogës./teve1/
