Krismat e armës prishën qetësinë e natës, të mërkurën mbrëma në lagjen “Kalabria”.
Një përleshje e nisur mes disa personave bëri që në rrugën “Rexhep Krasniqi”, të shkrepet arma e zjarrit.
Mbrëmjen e se mërkurës mbeti i plagosur një person ku sipas dëshmitarëve të cilit ishin prezent në vendin e ngjarjes të dyshuar ishin dy persona të cilët ishin të armatosur”
Banorët e kësaj zone nuk kanë dashur të flasin para kamerës mirëpo thonë se kanë dëgjuar veturat e Policisë të cilët kanë shkuar me shpejtësi në fund të kësaj rruge.
Detaje rreth këtij rasti kanë dhënë edhe nga ky institucion.
“Raportohet se viktima mashkull kosovar është plagosur me armë të zjarrit nga dy të dyshuar meshkuj kosovarë. Viktima është dërguar në QKUK për tretman mjekësor. Rasti është duke u hetuar”, thuhet në raportin e policisë”, thuhet nga Policia e Kosovës.
25 vjeçari i cili aktualisht po trajtohet në Klinikën e Ortopedisë është plagosur me disa plumba në këmbën e djathë dhe i njëjti do t’i nënshtrohet edhe një operacioni.
“Pacienti siç jeni në dijeni është pranuar mbrëmë në klinikën e Ortopedisë dhe pas ekzaminimeve të bëra ka rezultuar që ka lëndime me armë zjarri në këmbën e djathtë dhe ka predha në pjesën e femurit… janë disa predha. Gjendja e tij për momentin është stabile është në përpunim e sipër dhe planifikohet për intervenim operativ pas stabilizimi të gjendjes se tij”, ka thënë Xhavid Gashi – drejtor në Klinikën e Ortopedisë.
Por motivet se çka dërguan deri tek kjo plagosje ende nuk dihen, kurse personat e dyshuar ende nuk janë kapur nga organet e drejtësisë.
“Prokurori i shtetit në koordinim dhe në bashkëpunim të plotë janë duke ndërmarre të gjitha veprimet e nevojshme hetimore lidhur me rastin në fjalë, ndërsa kryersi për të cilin dyshohet se ka kryer veprën penale gjendet në arrati. Për momentin nuk mund të ofrojmë informata më shumë sepse mund të dëmtohet integritetit i çështjes në fjalë”, thuhet nga Prokuroria Themelore në Prishtinë.
Sipas të dhënave të deritanishme ndaj personit të dyshuar për kryerjen e kësaj vepre janë të hapura disa raste penale, përfshirë incidente me armë zjarri.
