Disa persona humbën jetën pasi një aeroplan privat u rrëzua të enjten në mëngjes në një lagje banimi ushtarake në San Diego, gjatë kushteve të vështira atmosferike me mjegull të dendur.
Autoritetet konfirmuan se nuk pati të lënduar në tokë, dhe se hetimet mbi shkaqet e rrëzimit po vazhdojnë.
Ndihmës shefi i zjarrfikësve të San Diegos, Dan Eddy, deklaroi në një konferencë për shtyp se ende nuk është konfirmuar numri i saktë i personave që ndodheshin në bord, por aeroplani kishte kapacitet për të mbajtur nga tetë deri në dhjetë pasagjerë.
Ai shtoi se po hetohet mundësia që aeroplani të ketë goditur një linjë elektrike para se të rrëzohej.
Incidenti ndodhi pak para orës 4 të mëngjesit në një nga lagjet më të mëdha të banimit ushtarak në zonë, ka raportuar AP.
Pamjet nga vendngjarja tregonin një shtëpi me çatinë e shembur dhe të përfshirë nga flakët, ndërsa të paktën gjashtë automjete u shkatërruan plotësisht. Rreth 10 shtëpi u dëmtuan, por banorët e tyre nuk pësuan lëndime që kërkonin trajtim spitalor, sipas autoriteteve.
Fluturimi nisi të mërkurën në mbrëmje në Teterboro, New Jersey, sipas FlightAware.
Aeroporti në Teterboro është rreth 10 kilometra nga Manhattan dhe përdoret shpesh nga avionë privatë dhe të korporatave.
