Disa Organizata Joqeveritare në Kosovë kanë dalë kundër shqyrtimit me procedurë të përshpejtuar të Projektligjit për zgjedhjet nacionale, raporton teve1.info
Përmes një reagimi publik, disa OJQ kanë shkruar se e kundërshtojnë trajtimin me procedurë të përshpejtuar të këtij projektligji.
“Prandaj, ne kundërshtojmë mundësinë e trajtimit të këtij projektligji në procedura të përshpejtuara – dhe atë në të dy leximet brenda ditës së sotme”, thuhet në reagim.
Sipas këtij njoftimi, disa nga ndryshimet më problematike të këtij projektligji kanë të bëjnë me integritetin e kandidatëve, pavarësinë e KQZ-së dhe votat e kandidatëve.
“Përshtatshmëria juridike e kandidatëve” është ndër ndryshimet më të dëmshme në kuadër të projektligjit, që cenon seriozisht integritetin zgjedhor”, thuhet ndër të tjera në reagim.
Po ashtu, sipas organizatave, projektligji i ri rrezikon edhe pavarësinë e KQZ-së.
“Meqenëse është paraparë mundësia e shkarkimit të kryesuesit apo anëtarëve të KQZ-së me propozim të 2/3 të anëtarëve të KQZ-së për rastet e dëmtimit të statusit apo integritetit të institucionit. Këto ndryshime nuk janë në linjë me rekomandimet e misioneve të BE-së, por as me standardet ndërkombëtare, për shkak se në vend të përcaktimit se cilat janë rrethanat apo veprimet që përbëjnë cenim të statusit apo integritetit, është mundësuar politizimi i përfundimit të mandateve të anëtarëve, por sidomos Kryesuesit të KQZ-së, që do t’a zbehë besimin e publikut në këtë institucion”, thuhet në reagim.
