Disa kamionë egjiptianë me ndihma hynë në Rripin e Gazës përmes pikës kufitare të Rafah të dielën në mëngjes, duke transportuar ndihma thelbësore, duke përfshirë ushqim dhe furnizime infrastrukturore, sipas mediave egjiptiane.
Pamjet video të transmetuara nga Al Qahera News treguan disa kamionë të ngarkuar me ton mallra që lëviznin nga pala egjiptiane në Gaza.
Ndërkohë, media Al-Ahram Gate raportoi se konvoji është pjesë e mbështetjes së vazhdueshme të Egjiptit për popullin palestinez.
Sipas raportimeve, furnizimet e transportuara nga kamionët egjiptianë dhe emiratë përfshijnë ushqime dhe materiale që synojnë rehabilitimin e infrastrukturës së dëmtuar.
Nuk pati asnjë deklaratë të menjëhershme nga Gjysmëhëna e Kuqe Egjiptiane ose autoritetet përkatëse mbi numrin e përgjithshëm të kamionëve ose orarin për dërgesa të mëtejshme, raporton Anadolu.
Duke refuzuar thirrjet ndërkombëtare për armëpushim, ushtria izraelite ka ndërmarrë një ofensivë brutale në Gaza që nga 7 tetori 2023, duke vrarë mbi 59,700 palestinezë, shumica prej tyre gra dhe fëmijë. Bombardimet e pamëshirshme kanë shkatërruar enklavën dhe kanë çuar në mungesë ushqimi.
Izraeli përballet me një padi për gjenocid në Gjykatën Ndërkombëtare të Drejtësisë për luftën e tij në enklavë.
