Disa fshatra të Komunës së Klinës po përballen me zjarre që kanë shkaktuar dëme të konsiderueshme materiale.
Kryetari i Klinës, Zenun Elezaj, ka njoftuar se së bashku me drejtorin e DSHPE-së, Qendrim Millaku, ndodhen aktualisht në terren në koordinim të plotë me ekipet e zjarrfikësve.
“Ekipet e zjarrfikësve po punojnë pa ndërprerje për të lokalizuar dhe vënë nën kontroll vatrat e zjarrit. Një falënderim shkon për ekipet e Klinës dhe ato nga Peja, Rahoveci e Gjakova, të cilët kanë ardhur menjëherë në ndihmë dhe po japin kontribut të çmuar në këtë situatë emergjente”, tha Elezaj.
Ai u ka bërë thirrje qytetarëve të tregojnë kujdes maksimal dhe të mos ndezin hamullore apo mbeturina, pasi rreziku për përhapjen e zjarreve është i madh dhe mund të shkaktojë pasoja serioze për jetën dhe pronën e qytetarëve.
“Komuna e Klinës do të vazhdojë të jetë e angazhuar me të gjitha kapacitetet për të menaxhuar situatën dhe për të mbrojtur sigurinë e qytetarëve tanë”, deklaroi kryetari Elezaj.
