Diplomati më i lartë i Iranit këmbënguli të dielën se forca e Teheranit vinte nga aftësia e tij për t’u “thënë jo fuqive të mëdha”.
Ministri i Jashtëm Abbas Araghchi, duke folur para diplomatëve në një samit në Teheran, sinjalizoi se Irani do t’i përmbahej qëndrimit të tij se duhet të jetë në gjendje të pasurojë uraniumin.
Kjo është një pikë e rëndësishme mosmarrëveshjeje me Presidentin amerikan, Donald Trump, i cili bombardoi vendet bërthamore iraniane në qershor gjatë luftës 12-ditore Iran-Izrael.
“Unë besoj se sekreti i fuqisë së Republikës Islamike të Iranit qëndron në aftësinë e saj për t’i bërë ballë ngacmimit, dominimit dhe presioneve nga të tjerët”, tha Araghchi, citon AP.
“Ata kanë frikë nga bomba jonë atomike, ndërsa ne nuk po synojmë një bombë atomike. Bomba jonë atomike është fuqia për t’u thënë jo fuqive të mëdha. Sekreti i fuqisë së Republikës Islamike qëndron në fuqinë për t’u thënë jo fuqive”, shtoi ai.
Komentet e tij vinë pas bisedimeve të së premtes në Oman, të cilat presidenti iranian, Masoud Pezeshkian i vlerësoi si “një hap përpara”.
Kryeministri izraelit Benjamin Netanyahu pritet të udhëtojë për në Uashington këtë javë, dhe Irani pritet të jetë tema kryesore e diskutimit, tha zyra e tij.
SHBA-ja tashmë ka zhvendosur aeroplanmbajtësen USS Abraham Lincoln , anije dhe avionë luftarakë në Lindjen e Mesme për të ushtruar presion ndaj Iranit për një marrëveshje dhe për të pasur fuqinë e nevojshme të zjarrit për të goditur Republikën Islamike nëse Trump zgjedh ta bëjë këtë.
