Zëvendëskryeministrja dhe ministrja e Punëve të Jashtme dhe Diasporës, Donika Gërvalla, ka pritur sot në takim tenorin me famë botërore, Ramë Lahaj, dhe tenorin e njohur meksikan Francisco Araiza, i cili ndodhet në Kosovë në kuadër të festivalit RLIOF, gjatë të cilit mban mastërklasën e tij në Kosovë.
Sipas njoftimit, Gërvalla falënderoi tenorin Ramë Lahaj për koncertin e djeshëm dhe për kontributin e tij të vazhdueshëm në skenën e artit dhe kulturës në Kosovë, jo vetëm përmes koncerteve të tij, por edhe përmes mbështetjes së artistëve dhe studentëve të muzikës dhe artit në Kosovë.
“Tenorit Araiza, ministrja Gërvalla i uroi mirëseardhjen në Kosovë dhe e falënderoi për gatishmërinë për të ndarë me studentët e këndimit përvojën e tij të jashtëzakonshme në skenat më të rëndësishme botërore si dhe ekspertizën e tij të pazëvendësueshme profesionale”
“Duke theksuar përkushtimin e institucioneve të Republikës së Kosovës dhe nevojën e pranisë më të madhe të Kosovës në skenën artistike ndërkombëtare, biseda u përqendrua më tej në rritjen e kapaciteteve materiale dhe njerëzore të diplomacisë kulturore si çelës për përçimin e identitetit të Kosovës në skenën botërore”, thuhet në njoftim.
