Ani pse Banka Qendrore e Kosovës ka marrë vendim për ndalimin e qarkullimit të kësaj monedhe, e njëjta po vazhdon të përdoret në Mitrovicë të Veriut.
E qytetarët serb në këtë komunë e kanë kundërshtuar vendimin e BQK-së.
Madje akuzuan edhe kryeministrin Kurti.
“Për momentin pranojnë dinarë. Mund të blihet edhe me dinarë, nuk ka problem Për momentin, por nuk e di çka do të bëhet. Nuk e di çfarë do të bëhet nesër”, thotë një qytetar serb,
“Mos pyetni si e shoh. Kurrqysh! Shumë keq. Si do të mbijetojmë ne pleqtë në këtë? Si? Kush do të rregullojë këtë? Nuk shoh gjë. Do të doja të jetoja si kam jetuar tërë jetën time. Nuk dua të ndryshoj këtë tash. Ne shumë zor gjendemi me këtë, kur shkojmë në dyqan. Kjo është shumë e vrazhdtë, nga kryeministri juaj, shumë keq” , shprehet një tjetër qytetar serb.
E një qytetar serb po thotë që është problematike edhe pranimi i pagave të cilat qytetarët i marrin nga Serbia.
“Nuk di çka të them. Nuk është mirë se duhet të funksionojë. Ne pranojmë pagat nga Serbia. Qysh do të vazhdohet? Nuk është njëjtë, nuk është. Shpresoj të rregullohet. Njerëzit rregullojnë gjithçka, edhe këtë shpresoj që gjithçka të jetë në rregull. Nuk do të ishte e drejtë. Ka shumë njerëz nga Kosova që marrin pagën nga Serbia. Nuk do të ishte e drejtë të mbetemi pa pagë e para. Ndonëse faleminderit fqinjëve tanë ata na japin pjesën e tyre. Nuk është e drejtë kjo. Shpresoj, njerëzit gjithçka rregullojnë, edhe kjo do të rregullohet”, thotë ai.
Edhe në institucione financiare e biznese të vogla u pa kryerja e shërbimeve në dinar.
Ndërkohë, Qeveria e Kosovës ka theksuar se rregullorja e BQK-së nuk nënkupton se do të ndalet trasferet e parave nga Serbia dhe po ashtu nuk nënkupton dënime financiare për posedimin e valutave të shteteve të tjera.
Megjithatë, nga 1 shkurti nuk do të lejohet importi i parave nëse institucionet që e bëjnë importin, nuk janë të licencuara nga BQK-ja.
