Mario Mitaj është një nga zbulimet e këtij viti te Kombëtarja e Shqipërisë, pasi ai ka qenë një titullar i padiskutueshëm në krahun e majtë të mbrojtjes.
Mbrojtësi i majtë ka shkëlqyer me kuqezinjtë, por paraqitje jashtëzakonisht të mira ka pasur edhe me klubin rus Lokomotiva e Moskës.
20-vjeçari ka zhvilluar 16 ndeshje me fanellën e gjigantit rus dhe ka një vit e gjysmë që është pjesë e kryeqytetasve ku iu bashkua nga AEK-u për tre milionë euro.
Megjithatë ai mund të largohet nga Rusia pasi gjiganti kroat Dinamo Zagreb ka shprehur interesim për transferimin e tij.
Mediumi kroat ’24sata’, që i referohet mediave ruse, raporton se mbrojtësi i Kombëtares shqiptare është në radarin e gjigantit kroat, Dinamo Zagreb.
Sipas lajmit të mediumit kroat bëhet me dije se trajneri i Dinamos së Zagrebit, Sergej Jakirovic dëshiron që të sjellë në Zagreb mbrojtësin e majtë të Kombëtares shqiptare.
Interesimi nga Dinamo është shumë i fortë, por mbetet të shihet nëse Lokomotiva e Moskës do të heqë dorë nga ylli i ri.
Në rast transferimi te Dinamo, Mitaj do të bënte një hap para në karrierë pasi me klubin kroat mund të luaj edhe në garat evropiane.
