Kryeministri në detyrë, Albin Kurti, ka folur për ndryshimet në kabinetin e ri qeveritar, të cilin Kuvendi nuk e votoi dje. Ai tha se mungesa e disa emrave, si Zëvendëskryeministri Besnik Bislimi, Ministrja Arbëria Nagavci dhe Ministrja e MINT-it, Rozeta Hajdari, nuk lidhet me vlerësim apo mosvlerësim të tyre, por është rezultat i analizave të brendshme dhe fazave të programit qeveritar.
“Të gjithë emrat që janë prezantuar janë rezultat i analizave tona të brendshme dhe emrat e përveçëm s’janë rezultat i ndonjë vlerësimi apo mosvlerësimi, por kryekëput çështje e fazës që na pret për programin tonë. Plane kemi edhe për emrat e përveçëm, ne do të jemi bashkë në ecjen tonë, por kur dhe ku – këto janë diskutime që nuk kanë të bëjnë me vlerësimin, por me fazat që na presin,” tha Kurti.
Ai shtoi se ndërrimet e pozitave dhe të digastereve nuk janë asnjëherë për qëllim ndëshkues:
“Kemi pasur ndërrime të pozitave, të digastereve dhe s’bëhet fjalë për kurrëfarë për gjykimi ndëshkues.”
Kurti komentoi edhe për Dimal Bashën, të cilin e prezantoi dje si pjesë të kabinetit në pozitën e Ministrit të Infrastrukturës:
“Më duhet të them për Dimal Bashën, gjithmonë e kam paramenduar në ekzekutiv dhe ju e dini që propozimi i VV-së për Kryetar Kuvendi ka qenë Albulena Haxhiu, si gruaja më e votuar në zgjedhje. Meqë u bë e pamundur të ecim përpara me të, dhe na erdhi vendimi i Gjykatës Kushtetuese, që thotë duhet të provosh tri herë, filluam të provojmë emra tjerë. Nuk është mirë të nxjerrim konkluzione që dikë që e propozuam nuk e donim në qeveri. Unë besoj që Basha e bën mirë punën si Kryetar Kuvendi, gjatë kësaj periudhe s’kam vërejtje ndaj tij, por besoj që vlera e tij e madhe njëmend do të ishte në ekzekutiv. Ajo çfarë ne besojmë dhe çfarë realizohet nuk përputhen. Dje ishte shansi që Dimal Basha të vinte në ekzekutiv.”
