Deputeti i Lëvizjes Vetëvendosje, Dimal Basha, në një lidhje direkte në emisionin “Mesditë” në Tëvë1 menjëherë pas dështimit të sencës së fundit ka komentuar situatën e krijuar në Kuvendin e Kosovës pas dështimit të 45-të për votimin e komisioneve parlamentare dhe zgjidhjen e ngërçit institucional.
Ai tha se qytetarët janë lodhur nga kjo situatë e pakëndshme dhe se opozita po vazhdon të shkelë aktgjykimin e Gjykatës Kushtetuese të vitit 2014, i cili lejon votimin e hapur apo të fshehtë për zgjedhjen e kryetarit të Kuvendit.
“Është seanca e 37-të që nuk votohet komisioni. Kishim marrëveshje me opozitën për mënyrën e votimit, por ata e refuzuan dhe e dërguan çështjen në Kushtetuese. Gjykata ua dha përgjigjen – votimi mund të jetë i hapur apo i fshehtë. Tani janë në shkelje të Kushtetutës”, tha Basha.
Sipas tij, nuk është Albulena Haxhiu problemi, por vetë procesi. Ai përmendi se Haxhiu është e gatshme të tërhiqet nëse nuk merr votat e nevojshme.
“Albulena Haxhiu ka deklaruar qartë: nëse nuk i merr 61 vota me votim të fshehtë, tërhiqet. Më pas, kryeministri sjell kandidat tjetër. Por opozita po e zvarrit dhe po e pengon procesin.”
Basha po ashtu akuzoi opozitën për standarde të dyfishta, duke përmendur rastet kur kanë votuar për Gjykatën Speciale, marrëveshjen për Asociacionin dhe amnistinë për kriminelë në Serbi.
“E kanë pasur më të lehtë të votojnë për Gjykatën Speciale, për Zajednicën dhe për amnistinë e kriminelëve, sesa për Albulena Haxhiun. Është e pakuptueshme. Kanë humbur betejën politike dhe juridike”, shtoi ai.
Në fund, Basha tha se ky ngërç po dëmton imazhin e Kosovës dhe se opozita po e shfrytëzon situatën për përfitime politike në dëm të institucioneve të vendit
