Kryetari i Kuvendit të Kosovës, Dimal Basha, ka bërë thirrje për pjesëmarrje në votime, duke ftuar qytetarët që ta shfrytëzojnë të drejtën e tyre për të votuar.
Në një postim në Facebook, Basha ka theksuar rëndësinë e secilit votues në këtë proces zgjedhor, duke thënë se disa minuta mund të përcaktojnë të ardhmen e katër viteve të ardhshme.
“Të dashur qytetarë, jemi në momentet e fundit të këtij procesi të rëndësishëm zgjedhor,” ka shkruar ai.
Deputeti i Vetëvendosjes u ka bërë apel të gjithë qytetarëve në 18 komunat ku po zhvillohen zgjedhjet, që të marrin pjesë në procesin demokratik.
“Ftoj të gjithë qytetarët – në të 18 komunat ku po mbahet votimi – që ta shfrytëzojnë këtë të drejtë themelore dhe të bëhen pjesë e vendimmarrjes për të ardhmen e tyre!” ka shtuar ai.
Në fund të postimit, Basha ka theksuar se çdo votë ka peshë dhe rëndësi në vendimmarrje.
“Katër minutat e tuaja sot, janë përcaktuese për katër vitet e ardhshme nesër!” ka përfunduar ai.
