Mëngjesin e hershëm të së premtes, blegtorë të shumtë kishin ardhur në tregun e kafshëve në Prishtinë.
Kjo për të shitur kurbanet me rastin e festës së Kurbani Bajramit.
E numri i qytetarëve të interesuar për të blerë ato ishte i lartë.
Dy dele këtu i bleu Shefqet Brajshori, i cili tha se çmimet janë të njëjta sikurse vitin e kaluar.
“Çmimet e kurbaneve si vjet sikurse ne vitin e kaluar nuk kanë asgjë dallim, bile po me duken me lirë këtë vit çmimi i tyre po sillet nga 200-230 euro”, thotë Brajshori.
Të arsyeshme çmimet e kurbaneve po i sheh edhe Beqir Avdiu.
“Çmimet me krahasua me këto të tjerat, çmime qysh janë a po e dinë edhe çmimi i kurbanit është i arsyeshëm. Sa dola tani kemi me marrë një 8 copa kësmet paska prej 200 deri në 400 euro”, thotë ai.
Por i pakënaqur me shitjet që pati është Xhavit Cakolli, i cili në orën gjashtë të mëngjesit kishte marrë rrugën nga fshati Krilevë i Kamenicës për në Prishtinë.
Madje ai ka edhe një ankesë tjetër.
“Të kënaqur jemi kanë jo sa duhet. Çmimi nuk ka qenë i mirë pak ka pas kërkues. Deri tani 20 kurban kam arrit me shit…Me na përkrah shteti pak më shumë që ku shesim ne në rrugë e ndotim vendin këtu i pengojmë krejt qytetarët. Me pas një vend të posaçëm për shitjen e kurbaneve e jo në rrugë”, thotë ai.
E më i kënaqur me shitjet është Xhelal Brahimi.
“Mirë shumë ka pasur shitje, rreth 300 euro po sillen çmimet. Një 30 shitje i kemi pas ne sot”, shprehet Brahimi.
Edhe këtë vit, Bashkësia Islame ka organizuar therjen e kurbaneve ku çmimi i një kurbani ishte 180 euro.
