Komuna e Ferizajt është deklaruar në lidhje me djegien e objektit të ish-gjimnazit të parë në Ferizaj “Ismail Qemali” i njohur si “Gjimnazi i Vjetër”.
Nga Komuna kanë njoftuar se dje kanë nisur ndërhyrjet e para për renovimin e këtij objekti.
“Në orët e para të mëngjesit të sotëm, objekti i ish Gjimnazit të Vjetër në Ferizaj, u përfshi nga zjarr masiv, duke shkaktuar dëme të mëdha në gjithë objektin, objekt ky që përfaqëson vlerë të trashëgimisë kulturore e që së fundmi, pikërisht dje më 13.03.2023, nga ana e operatorit ekonomik të kontraktuar nga Ministria e Kulturës, Rinisë dhe Sportit, nisën ndërhyrjet e para për renovimin e tërësishëm të objektit. Komuna e Ferizajt, përmes Drejtorisë së Shërbimeve Publike dhe Emergjencë, Shërbimit të Zjarrfikjes, me të marr informatën, ka dalur në vendngjarje duke ndërmarr të gjitha veprimet e nevojshme, me gjithë kapacitetin e plotë, për të shuar zjarrin”, thuhet në njoftim, raporton teve1.info.
Po ashtu, nga Komuna kanë thënë se do ta mbrojnë objektin me të gjithë kapacitetin e saj, pas punës restauruese.
“Komuna e Ferizajt, kërkon nga organet hetimore, organet e ndjekjes dhe gjyqësore që të zhvilloj hetim të tërësishëm të rastit dhe që shkaktarët e zjarrit të bëhen publike për qytetarët. Ky objekt përfaqëson vlerë të trashëgimisë kulturore të Ferizajt, andaj Komuna e Ferizajt me gjithë kapacitetin e saj e kompetencën ligjore, do ta mbroj këtë objekt për t’ia ofruar publikut, pas punës restauruese që do të ndodh në këtë objekt”, është bërë e ditur në njoftimin e Komunës së Ferizajt.
Në lidhje me këtë, ka reaguar edhe deputeti i Lëvizjes Vetëvendosje, Enver Haliti, i cili tha se krimi i organizuar dëshiron që ta shlyejë historinë e Ferizajt.
Sipas tij, për herë të katërt ose të pestë i vihet flaka objektit të mbrojtur të trashëgimisë kulturore.
Për rastin, në orët e hershme të mëngjesit janë deklaruar edhe Policia, teksa kanë thënë se shkolla ka qenë jofunksionale.
Teksa, sipas PK-së, përveç dëmeve materiale, nuk raportohet për të lënduar.
“Rreth orës 04:25 kemi pranuar një informatë se në një objekt shkollë të vjetër jofunksionale në rrugën ‘Ramadan Rexhepi’ është një incident zjarri. Ekipe të policisë, zjarrfikësve kanë dalë menjëherë në vendin e ngjarjes. Zjarri është lokalizuar, veç dëmeve materiale nuk raportohet për të lënduar”, kanë thënë ai për teve1.info
