Policia e Kosovës ka arrestuar një person në fshatin Sllatinë e Poshtme të komunës së Vitisë, pasi që dyshohet se ka shkaktuar një zjarr që dogji rreth 7 hektarë të mbjella me grurë.
Sipas raportit 24-orësh të Policisë, ngjarja ka ndodhur më 9 korrik 2025, rreth orës 16:35, kur i dyshuari kishte ndezur disa mbeturina, por zjarri më pas kishte dalë jashtë kontrollit dhe përfshiu edhe fushën me kulturën bujqësore.
“Si pasojë e një zjarri janë djegur rreth 7 hektarë të mbjella me grurë. Lidhur me rastin, pas hetimeve është identifikuar dhe arrestuar i dyshuari mashkull kosovar. Sipas ankuesit, vlera e dëmit sillet rreth 5000 euro”, thuhet në njoftimin e policisë.
Pas intervistimit në prani të prokurorit, i dyshuari është liruar në procedurë të rregullt, ndërsa hetimet rreth rastit po vazhdojnë.
