Dhuna në shkolla po rritet. Mirëpo ende ka tendencë për fshehjen e raportimit të tyre.
Kështu bëri të ditur Ministrja e Arsimit, Shkencës, Teknologjisë dhe Inovacionit, Arbërie Nagavci në Komisionin për të Drejtat të Njeriut.
“Raportimi i rasteve të dhunës ende nuk është në nivelin e duhur dhe dhuna fatkeqësisht vazhdon të jetë problem në shoqëri. Akoma ekziston tendenca që të fshihen rastet e tilla me frikën me frikën që reduktimi I rasteve do të bëjë përshkrimin se shkollat nuk janë aq të mira”, tha Nagavci.
Nagavci shtoi se granti po keqpërdoret nga drejtoritë komunale.
“Granti që është ndarë për punësimin e psikologëve është përdorur nga drejtoritë komunale për punësimin e kuadrove të tjera”, shtoi ajo.
E mungesa e tyre, sipas psikologut Visar Sadiku shkakton dëme në jetën e fëmijëve.
“Këto të bëma të cilat mund të ndodhin në institucionet shkollore, si pasojë e mungesës së psikologëve mund të jetë një dëm shumë i madh i cili mund ta afektojë më vonë jetën e fëmiut”, tha Sadiku.
Ndërsa drejtori i Qendrës për Punë Sociale, Vebi Mujku, thotë se viktimat e dhunës në familje, po reflektojnë edhe në institucionet shkollore.
“Secili fëmijë që është viktimë apo dëshmitar i dhunës në familje, ai i ka pasojat e veta në procesin mësimor, në rrugë, në sjellje me bashkëmoshatarët dhe kjo po reflektohet kohët e fundit jashtëzakonisht shumë nëpër shkolla, ku kemi një sipërfaqe të madhe të fëmijëve të cilët përveç bullizmit ushtrojnë edhe forma të ndryshme të dhunës mes tyre”, tha Mujku.
Gjatë vitit shkollor 2021/2022 u raportuan 20 raste të dhunës në shkolla.
Raporti i gazetares Albiona Hajdari.
