Më shumë se 107,000 civilë sudanezë janë zhvendosur nga qyteti El-Fasher dhe zonat përreth në shtetin e Darfurit të Veriut për shkak të përkeqësimit të sigurisë, tha të dielën Organizata Ndërkombëtare për Migracionin (IOM).
Sipas IOM, rreth 107,294 persona, ose 24,221 familje, u larguan nga El-Fasheri dhe zonat përreth midis 26 tetorit dhe 8 dhjetorit, pasi Forcat Paraushtarake të Mbështetjes së Shpejtë (RSF) morën kontrollin e qytetit dhe situata e sigurisë u përkeqësua ndjeshëm.
Rreth 72% e të zhvendosurve qëndruan brenda Darfurit të Veriut, kryesisht në pjesët veriore dhe perëndimore, ndërsa rreth 19% u zhvendosën në shtete të tjera, përfshirë Darfurin Qendror, Shtetin Verior dhe Shtetin e Nilit të Bardhë.
Ekipet në terren raportuan se rreth 75% e të zhvendosurve ishin tashmë persona të zhvendosur brenda vendit, përfshirë ata që kishin ikur më parë nga kampet Zamzam dhe Abu Shouk ose nga lagje të El-Fasherit gjatë përshkallëzimeve të mëparshme.
IOM paralajmëroi se pasiguria e vazhdueshme dhe kufizimet e lëvizjes mund të ndikojnë më tej në rrugët e zhvendosjes. Agjencia theksoi se shifrat janë paraprake dhe situata mbetet shumë e paqëndrueshme.
Ndërkohë, luftimet e ashpra midis ushtrisë dhe RSF-së në tre shtetet e Kordofanit kanë detyruar dhjetëra mijëra njerëz të largohen. RSF kontrollon pesë shtetet e Darfurit, përveç disa pjesëve të Darfurit të Veriut, ndërsa ushtria mban kontrollin mbi shumicën e shteteve të tjera, përfshirë kryeqytetin Khartum.
Konflikti, që nisi në prill 2023, ka vrarë mijëra njerëz dhe ka zhvendosur miliona të tjerë në mbarë Sudanin.
