Dhoma e Tregtisë dhe Industrisë Kosovë (DhTIK) ka shprehur shqetësimin e thellë lidhur me problemet e shumta që, sipas saj, janë shkaktuar nga bllokada e gjatë si pasojë e Ligjit për Pronën Publike.
Drejtori ekzekutiv i DhTIK-së, Kushtrim Ahmeti, deklaroi se kriza e zgjatur institucionale ka thelluar vështirësitë për një numër të madh kompanish në vend.
Sipas tij, bllokada ka ndikuar drejtpërdrejt në uljen e fuqisë ekonomike të bizneseve dhe ka rrezikuar shumë vende pune.
Ahmeti theksoi se situata aktuale ka sjellë rritje të çmimeve dhe rritje të importeve, veçanërisht nga Serbia dhe Maqedonia e Veriut, duke krijuar probleme zinxhirore në treg.
Ai shtoi se shumë kompani kanë hequr dorë nga planet për zgjerim të investimeve në Kosovë, ndërsa disa të tjera po shqyrtojnë mundësinë e investimeve jashtë vendit, çka, sipas tij, dërgon një mesazh negativ për investitorët e huaj.
Në takimin e organizuar, anëtari i bordit, Idriz Zejnullahu, si dhe anëtarët e grupit të punës Faton Nuredini dhe Binak Kalludra, prezantuan detaje mbi ndikimin që bllokada ka pasur në sektorin minerar.
Të pranishmit u pajtuan për nevojën emergjente të ndërmarrjes së masave konkrete për ndryshimin e Ligjit për Pronën Publike, me qëllim të zhbllokimit të situatës dhe stabilizimit të klimës së biznesit në vend.
