Për disa vjet qëndroi në dhomat e paraburgimit në Hagë.
Hysni Gucati vuajti dënimin nga Gjykata Speciale, por që tashmë është në liri.
Ai kërkoi të kthehet sërish në Qendrën e paraburgimit, por kësaj here si vizitor te krerët e Ushtrisë Çlirimtare të Kosovës.
Por, kryetarit të Organizatës së Veteranëve të Luftës iu refuzua kjo kërkesë një ditë para vizitës.
“Jo nga Gjykata por nga Qendra e Paraburgimit nga shefi i Qendrës së Paraburgimit ma ka ndaluar vizitën ta vizitojë Jakup Krasniqin, Rexhep Selimin, Pjetër Shalën dhe Salih Mustafën. Tash e kam vizitën tjetër që e kam bërë më 14 maj që mu ka leju, dmth mu ka pranu vizita nga Hashim Thaçi dhe Kadri Veseli që me 14 maj po shpresoj që të shkoj t’i vizitojë Hashim Thaçin dhe Kadri Veselin, dytë në Qendrat e Paraburgimit, dhashtë zoti që mos të më ndodhë kjo që më ka ndodhë me datën 17”, tregoi Gucati.
Sipas tij, në përgjigjen e Dhomave të Paraburgimit nuk është treguar arsyeja e refuzimit.
“Asnjë arsyetim nuk më kanë jep, vetëm thotë Shefi i Qendrës së Paraburgimit ta anulon vizitën, nuk ka asnjë arsyetim, asnjë pikë asnjë presje vetëm thotë se ndalohet vizita pa arsyetim hiq, nuk ka aryse. Masi ma kanë konfirmuar vizitën, me datën e caktuar e kom pas kah 40 minuta vizitën jo qysh kanë qenë përpara vizitat tërë ditore por i kam pasur kah 40 minuta vizitë te secili kah 40 minuta që ma kanë pranu dhe jo nuk më kanë leju që të shkoj t’i vizitojë, një ditë para fluturimit”, tha ai.
E nga Gjykata Speciale për tëvë1, nuk kanë dhënë shumë detaje lidhur me refuzimin e kërkesave për vizitë.
“Kryezyrtari i Paraburgimit normalisht miraton një kërkesë për një vizitë, përveç nëse ka pasur mosrespektim të Udhëzimit të Praktikës mbi Vizitat dhe Komunikimet, Udhëzimit të DMU-së mbi Procedurat e Vizitave për Anëtarët e Familjes dhe Vizitorët e Tjerë Personalë, ose nëse është në interes të sigurimit të sigurisë, mbrojtjes dhe rendit të mirë në Qendrat e Paraburgimit”, thuhet nga Gjykata Speciale.
Ndërsa sipas avokatit të akredituar nga Specialja, ndalimi i komunikimit edhe me familjarët, paraqet shkelje të rregullave dhe të drejtave të të burgosurve.
“Është jashtëzakonisht absurde të ndalohen edhe komunikimet përmes telefonit, e sidomos nëse merret parasysh fakti se të gjitha ato biseda telefonike incizohen, kështu që asnjë person nuk do ta përdorte bisedën telefonike me telefoni fikse për të ndikuar në dëshmitarë apo diçka tjetër”, tha avokati Artan Qerkini.
Krerët e UÇK-së po qëndrojnë në Dhomat e Paraburgimit nga nëntori i vitit 2020.
