Dhoma e Tregtisë dhe Industrisë e Kosovës (DHTIK) ka përshëndetur vendimin për heqjen e bllokadave nga kompanitë transportuese të vendeve të rajonit, duke e cilësuar këtë zhvillim si një hap pozitiv drejt normalizimit të qarkullimit të mallrave.
Sipas DHTIK-së, këto bllokada kishin ndikuar drejtpërdrejt në funksionimin e zinxhirëve të furnizimit, duke shkaktuar vonesa të konsiderueshme në import dhe eksport, rritje të kostove operative për kompanitë kosovare, si dhe pasiguri për sektorë të ndryshëm ekonomikë.
“Shumë biznese janë detyruar të shtyjnë eksportet drejt vendeve të ndryshme evropiane, ndërsa zgjatja e kësaj bllokade do të mund të shkaktonte mungesë produktesh dhe rritje të çmimeve në Kosovë”, thuhet në reagimin e DHTIK-së.
Kjo dhomë thekson se është e domosdoshme që institucionet e Kosovës, në bashkëpunim me ato të rajonit dhe Bashkimin Evropian, të angazhohen për zgjidhje afatgjata që do të parandalonin përsëritjen e situatave të ngjashme në të ardhmen.
“Dhoma do të vazhdojë të monitorojë nga afër zhvillimet dhe të bashkëpunojë me institucionet vendore dhe partnerët ndërkombëtarë për mbrojtjen e interesave të komunitetit të biznesit në Kosovë”, thuhet në njoftimin e DHTIK-së.
