Dhoma e Tregtisë dhe Industrisë së Kosovës (DhTIK) ka shprehur shqetësimin e saj të thellë për mosreagimin e Zyrës së Rregullatorit për Energji (ZRRE), pas aktgjykimit të nxjerrë më 29 korrik 2025 nga Gjykata Komerciale.
Bazuar në pikën 2 dhe 4 të këtij aktgjykimi, DhTIK kishte pritur një veprim konkret nga ana e ZRRE-së. Megjithatë, deri më sot, nuk është ofruar asnjë sqarim apo njoftim zyrtar nga ky institucion lidhur me hapat e mëtejshëm.
Sipas DhTIK-së, shumë kompani që nuk kanë nënshkruar kontrata për furnizim me energji elektrike nuk kanë asnjë informacion se nga kush po furnizohen dhe kujt duhet t’i përgjigjen për faturimin mujor.
“Pas këtij aktgjykimi, ne vlerësojmë se nuk ka më vend për vazhdim të procesit të liberalizimit të tregut të energjisë në formën aktuale”, thuhet në reagimin e Dhomës.
Për këtë arsye, Dhoma e Tregtisë dhe Industrisë i është drejtuar sërish ZRRE-së me kërkesën që të pezullojë vendimin për liberalizimin e tregut të energjisë dhe të nisë menjëherë konsultimet publike me të gjitha palët e interesuara.
Në mungesë të një reagimi institucional, Dhoma ka adresuar një kërkesë urgjente edhe tek Presidentja e Republikës së Kosovës, znj. Vjosa Osmani.
“Që nga muaji mars, kur përmes mediave mësuam për nisjen e këtij procesi, ne kemi ofruar bashkëpunimin tonë të plotë me institucionet. Nuk kemi qenë dhe nuk jemi kundër liberalizimit të tregut të energjisë, por kundër mënyrës se si është vendosur të zbatohet ky proces”, theksohet në deklaratën zyrtare të publikuar në faqen e Dhomës në Facebook.
