Dhoma e Përfaqësuesve e Shteteve të Bashkuara miratoi të mërkurën, për herë të parë, një rezolutë mbi fuqitë e luftës që synon të ndalojë veprimet ushtarake amerikane kundër Iranit, duke sfiduar Presidentinamerikan, Donald Trump.
Një numër republikanësh iu bashkuan demokratëve në mbështetje të masës, duke reflektuar pakënaqësinë në rritje ndaj konfliktit që ka zgjatur për tre muaj dhe ka ndikuar ndjeshëm në politikën e brendshme dhe atë të jashtme të vendit.
Kryetari i Dhomës së Përfaqësuesve, Mike Johnson, kishte tentuar të pengonte votimin duke ndërprerë papritur seancën parlamentare dy javë më parë, kur rezoluta ishte pranë miratimit.
Megjithatë, kundërshtimi ndaj luftës është shtuar ndërsa konflikti vazhdon dhe administrata Trump përpiqet të arrijë një marrëveshje paqeje.
Rezoluta u miratua me 215 vota pro dhe 208 kundër, shkruan AP. Megjithatë, e ardhmja e saj mbetet e pasigurt, pasi Trump pritet të kundërshtojë çdo përpjekje të Kongresit për të kufizuar autoritetin e tij si komandant i përgjithshëm i forcave të armatosura.
Që nga 28 shkurti, kur Shtetet e Bashkuara iu bashkuan Izraelit në sulmet ajrore kundër Iranit, çmimet e karburanteve në SHBA janë rritur, duke shtuar presionin inflacionist mbi konsumatorët.
Situata është ndikuar edhe nga aftësia e Iranit për të penguar transportin detar përmes Ngushticës së Hormuzit, një rrugë strategjike për eksportin e naftës, gazit natyror dhe produkteve të lidhura me to, përfshirë plehrat kimike.
Përfaqësuesi Gregory Meeks i Nju Jorkut, demokrati më i lartë në Komitetin e Punëve të Jashtme të Dhomës së Përfaqësuesve, i cili udhëhoqi përpjekjen tha se, “Është koha që presidenti të bëjë gjënë e duhur”.
“Njerëzit janë të lodhur nga vuajtjet për shkak të luftës së tij të zgjedhur — vuajtje në pompën e benzinës, vuajtje në supermarket”, tha ai.
Megjithëse një armëpushim u shpall në prill, situata mbetet e brishtë dhe e paqëndrueshme.
Negociatat për një marrëveshje më afatgjatë kanë hasur vështirësi, të ndërlikuara më tej nga përshkallëzimi i sulmeve izraelite në Liban.
