Sulmet izraelite vranë të paktën 52 persona në Rripin e Gazës të hënën, përfshirë 36 në një shkollë të shndërruar në strehë, e cila u godit ndërsa njerëzit flinin, duke u vënë flakën sendeve të tyre, sipas zyrtarëve lokalë të shëndetësisë, ka raportuar AP.
Numri i viktimave në shkollën Fahmi Al-Jirjawi, që ndodhet në lagjen al-Daraj dhe strehoi persona të zhvendosur, është rritur në 30.
Pas shpërthimit, tendat që ndodheshin pranë u përfshinë nga zjarri, raportuan televizioni Al-Aqsa dhe burime të tjera në terren.
Pamjet e publikuara online treguan trupa të djegur, përfshirë fëmijë, dhe njerëz që qanin ndërsa përpiqeshin të shpëtonin nga flakët. Sipas një raporti lokal, skena ishte e mbushur me britma dhe kufoma të djegura.
Ushtria izraelite e konfirmoi sulmin, duke deklaruar se objekti ishte kthyer në një “qendër komande dhe kontrolli” nga Hamasi, por nuk ofroi asnjë provë për të mbështetur këtë pretendim.
Në një tjetër sulm ajror të kryer po atë ditë në Jabalia, u vranë të paktën 19 persona dhe u plagosën disa të tjerë. Sipas dëshmitarëve, një ndërtesë shumëkatëshe u shkatërrua plotësisht, duke zënë brenda dhjetëra banorë të zhvendosur.
Që nga tetori 2023, Izraeli ka zhvilluar një fushatë ushtarake të ashpër në Rripin e Gazës, duke shkaktuar vdekjen e mbi 53,900 palestinezëve – shumica prej tyre gra dhe fëmijë – dhe duke injoruar thirrjet ndërkombëtare për një armëpushim.
Në nëntor, Gjykata Ndërkombëtare Penale lëshoi urdhër-arreste për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, duke i akuzuar për krime lufte dhe krime kundër njerëzimit në Gaza.
Paralelisht, Izraeli është paditur në Gjykatën Ndërkombëtare të Drejtësisë për gjenocid në enklavë.
