Autoritetet kineze kanë evakuuar rreth 60,000 njerëz nga shtëpitë e tyre në Guangdong, pasi reshjet e shiut kanë shkaktuar përmbytje masive në provincën më të populluar të Kinës.
Njëmbëdhjetë persona janë zhdukur, ndërsa deri më tani nuk raportohet për viktima.
Pamjet në mediat shtetërore dhe në internet tregojnë sipërfaqe të mëdha toke të përmbytura nga përmbytjet, derisa disa lumenj të mëdhenj kanë dalë nga shtrati dhe autoritetet po monitorojnë nga afër nivelet “të larta të rrezikshme” të ujit.
Fluturimet janë anuluar dhe vonuar në Aeroportin Ndërkombëtar Baiyun në kryeqytetin Guangzhou për shkak të reshjeve të vazhdueshme të shiut, ndërsa shkollat janë urdhëruar të mbyllen në të paktën tre qytete, shkruan BBC.
Dhjetra shtëpi në të gjithë provincën ose janë shembur ose janë dëmtuar rëndë, me autoritetet që vlerësojnë një humbje të drejtpërdrejtë ekonomike prej afro 140.6 milionë juanë (19.8 milionë dollarë).
