Zyrtarë palestinezë dhe dëshmitarë kanë thënë se forcat izraelite kanë qëlluar në njerëzit të cilët ishin duke shkuar drejt një qendre të shpërndarjes së ndihmave të martën, ku u vranë të paktën 27 persona.
Kjo është dita e tretë që ndodhin incidente të natyrës së tillë. Ushtria konfirmoi sulmin dhe tha se ka qëlluar afër “disa subjekteve të dyshuara” që lanë rrugën e paraparë për tek ndihmat, raportoi AP.
Të shtënat ndodhën të gjitha në Rrethrrotullimin e Flamurit, rreth një kilometër (1.000 jardë) nga një prej vendeve të shpërndarjes së GHF-së në qytetin jugor tani kryesisht të pabanuar të Rafah-ut.
E gjithë zona është një zonë ushtarake izraelite ku gazetarët nuk kanë qasje jashtë vendeve të miratuara nga ushtria.
Gjashtë palestinezë të tjerë u vranë, përfshirë dy fëmijë, kur avionët luftarakë izraelitë goditën shtëpitë dhe tendat e civilëve të zhvendosur në qytetin jugor të Khan Younis, tha agjencia zyrtare e lajmeve Wafa, duke cituar mjekët.
Dy persona të tjerë u vranë dhe të tjerë u plagosën në një sulm izraelit ndaj një grupi civilësh në qytetin Jabalia në Gazën veriore, tha Wafa.
Të shtënat pothuajse të përditshme kanë ndodhur pasi një fondacion izraelit dhe i mbështetur nga SHBA- të krijoi pika shpërndarjeje të ndihmave brenda zonave ushtarake izraelite.
Kombet e Bashkuara dhe organizatat humanitare kanë kritikuar sistemin dhe nuk kanë pranuar të bëhen pjesë e saj, duke thënë se ai nuk adreson krizën në rritje të urisë në Gaza dhe i lejon Izraelit të përdorë ndihmën si armë, gjë që shkon kundër principeve humanitare.
Izraeli ka ndërmarrë një ofensivë shkatërruese në Gaza që nga tetori i vitit 2023, duke vrarë gati 54,500 palestinezë, shumica prej tyre gra dhe fëmijë.
Agjencitë e ndihmës kanë paralajmëruar për rrezikun e urisë për më shumë se 2 milionë banorë të enklavës.
