Për vetëm 20 ditë e në total 4 ndeshje si përzgjedhës i Kosovës në basketboll, Jean Denys Choulet është paguar 10 mijë euro.
Selektori i “Dardanëve” në basketboll, nga kontrata e tij me Federatën e Basketbollit të Kosovës, e të cilën e ka siguruar Tëvë 1, është paguar nga 5 mijë euro për një dritare kualifikuese, brenda së cilës janë zhvilluar dy ndeshje.
Choulet erdhi te Kosova në fund të tetorit të vitit të kaluar duke e zëvendësuar Rami Hadarin.
Ai ka udhëhequr Kosovën në katër duele, duke realizuar një fitore ndaj Azerbajxhanit dhe duke u mposhtur dy herë nga Zvicra dhe një herë nga Irlanda.
Në dokumentin e siguruar ekskluzivisht nga Tëvë 1, Choulet do të paguhet nga 5 mijë euro për një dritare të shkurtër kualifikimi prej 20 ditësh.
Për dritaret e gjata kualifikuese prej 35 ditëve, ai do të paguhet 7 mijë euro dhe nëse e udhëheq Kosovën në kqmpionat evropian, do të paguhej 10 mijë euro. Në kontratë janë të parapara edhe bonuset, plus 3 mijë euro nëse e kalon një rreth kualifikues dhe 12 mijë euro nëse Kosova kualifikohet në Eurobasket.
Por asnjëri objektiv nuk u arrit me Chouletin në krye. Për herë të pestë rresht Kombëtarja e Kosovës në basketboll, nuk i ka kaluar parakualifikimet.
Dardanët nuk arritën të avancojnë prej fazës së parë të parakualifimeve evropiane për Kupën e Botës 2027, duke përfunduar në vendin e tretë me dy fitore e katër disfata, në një grup me Zvicrën, Irlandën e Azerbajxhanin.
Ish-basketbollist e njohës të basketbollit në vend kanë kritikur përzgjedhësin dhe institucionin e basketbollit në vend, FBK.
