45 vite më parë ishin në ballë të demonstratave.
Vetëm një synim kishin, që Kosova të njihej si njësi e barabartë shtetërore në federatën jugosllave.
Mirëpo po atë datë të 2 prillit 1981, Naser Hajrizi e Asllan Pireva ranë heroikisht.
Revolta e tyre, dhe shumë studentëve të tjerë, shënoi atë ditë si moment historik në luftën për liri e barazi.
Guximin dhe vendosmërinë e Hajrizit e Pirevës, i ka të freskëta Arsim Kelmendi, i cili ishte pjesë e këtyre demonstratave.
“Na u kanë bashkëngjitë gjimnazistë që kanë qenë shumë më të ri se na, ne ishim 17 vjeçar ata ishin 15 vjeçar. Kurse me Naserin atë ditë kur ka ra për t’u përjetësuar, jemi nda të përmendorja ku ndahen dy rrugët, ai është ndarë andej ne kemi ardhur këndej. Kurse më së shumti që na ka frymëzuar neve është rënia e tij dhe qëndrimi i familjes kur kemi shkuar pas dy javësh ne shoqëria. Naseri ka mbetur frymëzim deri sot dhe do të vazhdojë të jetë frymëzim”, thotë Arsim Kelmendi, ish-student.
Ata, si shumë studentë të tjerë, kishin vetëm një kërkesë.
“Thirrjet e fuqishme për Kosovën Republikë vazhdonin edhe në atë gjendje ndër ta edhe dy të pandarit tonë, Asllani e Naseri të cilët me flamurin në dorë në këtë pikë që jemi sot i kujtojmë 45 vite. Ato ditë e kujtojmë këngën e tyre, ku shkolla buqiste nga kënga patriotike, këngë të cilat na sollën deri te protesta e madhe. Çdo kund, edhe në rrugë, temë kryesore ishte çlirimi e që Kosova të bëhej republikë”, thotë Skender Sejdiu, ish-profesor.
Dhimbja, sipas profesorit të tyre, u rëndua edhe më shumë pas kthimit në shkollë.
“Dhimbja më e madhe ka qenë kthimi në shkollë ku në dy bankat e zbrazëta ishin karainfilat e kuq , nxënësit ishin të gjithë të përlotur, asnjëri nuk e qonte kokën, por në emër të të rënëve u dashtë një kushtrim dhe një thirrje që ta vazhdojmë rrugën e tyre”, kujton Sejdiu.
Ndonëse i kishte vetëm 5 vjet asokohe, Bujar Hajrizi e kujton më shumë krenari vëllain e tij, Naserin.
“Për neve rënia e tij ka qenë një humbje e madhe, por ka qenë një krenari, se këtij vendi u deshtë me i dhënë gjak, u deshtë dikush me sakrifiku që me u ngritë këto themele të shtetit dhe ne sot me gëzu lirinë”, shprehet ai.
45 vite pas, këtë të enjte u përkujtua kontributi i Hajrizit e Pirevës për pavarësinë e Kosovës.
“Demonstratat e vitit 1991 ishin udhërrëfyes prijës për rrugën e mëvonshme të lirisë së popullit shqiptar që nuk u ndalën, por u përsëritën në çdo vit”, thotë Shefki Sadiku nga Shoqata e ish të burgosurve politikë.
“Kjo tregon një histori të popullit tonë në etapa të ndryshme që njerëzit e ndryshëm kanë dhënë kontributin e tyre duke dhënë edhe jetën që sot ta kemi një paqe, ta kemi demokracinë”, tha kryetari i Prishtinës, Përparim Rama.
Në nder të sakrificës së tyre, familjarë të shumtë e ish studentë vendosën kurora lulesh paranë pllakës përkujtimore e cila gjendet jo shumë metra larg objektit të Qeverisë.
Naser Hajrizi dhe Asllan Pireva ishin organizatorë të të rinjve në demonstratën e mëngjesit të 2 prillit 1981 në qendër të Prishtinës.
Ata u vranë nga të shtënat e oficerëve ushtarakë, të vendosur gjatë natës në objektin e ish-Bankës Popullore.
