Policia e Shqipërisë ka njoftuar se janë përmbyllë veprimet hetimore lidhur me rastin vrasjes së gjyqtarit Astrit Kalaja.
Policia ka dhënë detaje si dy të shtetasit E.Sh dhe G.SH të arrestuar për këtë rast kanë hyrë në objektin e gjykatës.
Sipas Policisë ata kishin hyrë në orën 13:42 duke kaluar nga pajisja skaner dhe pavarësimit se në ekranin e detektorit është sinjalizuar prezenca e metaleve, punonjësi i sigurisë në objektin Gjykatës së Apelit nuk kishte reaguar .
“Në orën 13:42, në ambientet e sallës së pritjes për publikun të Gjykatës janë futur dhe kanë kaluar nga pajisja skaner (detektor), njëri pas tjetrit, shtetasit E. Sh. dhe G. Sh. Në ekranin e detektorit është sinjalizuar prezenca e metaleve duke ndezur dritat e kuqe, por shtetasi B. K., me detyrë punonjës sigurie pranë Gjykatës së Apelit Tiranë, ka qëndruar i ulur në karrige dhe nuk ka kryer asnjë veprim për kontrollin fizik të këtyre shtetasve apo regjistrimin e tyre në librin e protokollit, ku duhet të evidentohen të gjithë personat që hyjnë dhe dalin nga ambientet e Gjykatës. Të dy këta shtetas, E. Sh. dhe G. Sh., qëndrojnë në hollin e pritjes së Gjykatës deri rreth orës 15:29, dhe më pas futen në ambientet e sallës së zhvillimit të seancës gjyqësore (salla nr. 3). Në orën 15:35, palët ngrihen në këmbë dhe, menjëherë pasi gjyqtari A. K. shpall vendimin, shtetasi E. Sh., që ndodhej në sallë, nxjerr nga brezi një armë zjarri pistoletë dhe qëllon disa herë në drejtim të gjyqtarit A. K., i cili, si pasojë e dëmtimeve të marra dhe pas ndihmës së parë mjekësore, ka ndërruar jetë gjatë transportit për në spital”, thuhet nga Policia e Shtetit.
