Publikohen detaje të reja për ngjarjen e rëndë që ndodhi të martën mbrëma në fshatin Bajnicë të Kaçanikut, ku Sylë Fazliu 59-vjeçar, punëtor teknik i shkollës, humbi jetën, pasi, siç dyshohet, ka rënë në bunarin e shkollës.
Zbardhja e rrethanave të vdekjes mbetet ende në proces hetimor.
Instituti i Mjekësisë Ligjore konfirmoi për Kosovapress se autopsia tashmë është kryer, ndërsa raporti përfundimtar pritet të përpilohet në ditët vijuese.
Ndërsa, drejtori i Arsimit në Kaçanik, Gazmend Bunjaku, bëri të ditur se punëtori teknik i shkollës tashmë i ndjerë pasi ka mbaruar mësimi me siguri sipas detyrës së punës ka dalë të pastrojë aty dhe pastaj nuk dihet se çka ka ndodhur.
Sipas Bunjakut, punëtori teknik, pasi është vonuar për t’u kthyer në shtëpi, një familjar ka shkuar ta kërkojë te shkolla, e ka parë kapakun e bunarit hapur, ka dyshuar që ka rënë aty dhe ka njoftuar policinë.
Kosovapress kontaktoi edhe me Prokurorinë Themelore në Ferizaj. Në këtë prokurori thanë se pas marrjes së raportit të autopsisë do të dalin me hollësi të tjera.
Më herët gjatë ditës , Policia e Kosovës këtë rast e ka cilësuar si vdekje të dyshimtë.
