Një sasi e konsiderueshme e narkotikëve është sekuestruar në një aksion të zhvilluar sot në rajonin e Pejës, ku autoritetet kanë zbuluar dhe asgjësuar një laborator për kultivimin e kanabisit.
Sistemi Prokurorial nga hetuesia bëjnë të ditur se gjatë operacionit janë konfiskuar gjithsej 91 bimë të llojit Cannabis sativa, së bashku me pajisje të avancuara që shërbenin për prodhimin e narkotikëve.
Përveç bimëve narkotike, gjatë kontrollit janë gjetur edhe elemente të tjera që lidhen me veprimtarinë e kundërligjshme, përfshirë pajisje teknologjike dhe dëshmi të përdorimit të energjisë elektrike në mënyrë ilegale për funksionimin e laboratorit.
Në kuadër të këtij aksioni është arrestuar një person i dyshuar, i cili është ndaluar për 48 orë me urdhër të prokurorit të shtetit, ndërsa hetimet pritet të vazhdojnë për zbardhjen e plotë të rastit.
“Në kuadër të operacionit anti-drogë të planit operativë “Stop drogave” janë sekuestruar gjithsej 91 bimë narkotike të llojit Kanabis sativa, pajisje të sofistikuara për prodhimin e narkotikëve, një armë zjarri, si dhe është konstatuar kyçje ilegale në rrjetin elektrik për funksionimin e këtyre pajisjeve në kuadër të veprimtarisë së kundërligjshme”, thuhet në njoftim. /teve1.info/
