Katër persona kanë përfunduar në prangat e policisë pas një përleshjeje të ndodhur mbrëmjen e së mërkurës në lagjen “Bregu i Diellit” në Prishtinë.
Sipas raportit 24-orësh të Policia e Kosovës, ngjarja ka ndodhur rreth orës 20:40 në rrugën “Vëllezërit Gërvalla”, pas një mosmarrëveshjeje që fillimisht ka nisur si konflikt verbal dhe më pas ka eskaluar në përleshje fizike mes katër të dyshuarve, të gjithë meshkuj dhe shtetas të Afganistanit.
Gjatë rrahjes dyshohet se është përdorur edhe një mjet i mprehtë – thikë. Si pasojë e incidentit, dy nga të dyshuarit kanë pësuar lëndime trupore dhe kanë pranuar trajtim mjekësor.
Njësitë policore që kanë dalë në vendin e ngjarjes kanë sekuestruar një thikë, e cila dyshohet të jetë përdorur gjatë përleshjes.
Me vendim të prokurorit të rastit, pas intervistimit, të katër të dyshuarit janë dërguar në mbajtje, ndërsa rasti po hetohet në drejtim të veprave penale “Lëndim i lehtë trupor” dhe “Armëmbajtje pa leje”.
