Në mëngjesin e sotëm është kryer një bastisje në Ministrinë e Mjedisit. Me urdhër të Prokurorisë Speciale është zhvilluar një aksion ku janë të dyshuar dy zyrtarë për kryerjen e veprës penale që lidhet me keqpërdorimin e detyrës zyrtare. Në stacionin policor është shoqëruar sekretari i përgjithshëm i ministrisë në fjalë, Izedin Bytyqi.
Ky mëngjes nuk ishte i zakonshëm në Ministrinë e Mjedisit.
Policia e Kosovës zbarkoi në orët e hershme të mëngjesit të së martës në objekt dhe u realizua një bastisje.
Gjatë gjithë kohës po qëndronte një veturë e Policisë.
E pas disa orësh pritje, nën shoqërimin e Policisë erdhi sekretari i përgjithshëm i Ministrisë së Mjedisit, Izedin Bytyqi.
I njëjti më pas u dërgua në stacionin policor.
Aksionin në fjalë e konfirmoi edhe Prokuroria Speciale.
“Me urdhër të Prokurorisë Speciale të Kosovës është duke u zhvilluar një aksion në MMPHI. Janë dy persona të dyshuar për kryerjen e veprës penale që lidhen me keqpërdorimin e detyrës zyrtare nga neni 414 i KPK-së, shpëlarjes së parasë nga neni 302 i KPK-së dhe veprën penale të mosraportimit apo raportimit të rremë i pasurisë, të të ardhurave, të dhuratave, të dobisë tjetër materiale ose detyrimeve financiare, nga neni 430, paragrafi 2 i KPK-së”, tha Prokuroria Speciale.
Në stacionin policor është përcjellë vetëm njëri nga zyrtarët.
Derisa po qëndronte ekipi i Tëvë1 në oborrin e ministrisë, disa materiale, kompjuterë, dosje dhe dokumente janë sekuestruar nga hetuesit policorë.
Gjatë kësaj kohe të pranishme ishin edhe dy autoambulanca.
