Fillimisht u mbajte mbledhja.
E më pas nisi edhe aksioni.
Kështu në orët e para të mëngjesit Prokuroria Themelore në Pejë bashkë me drejtorinë kundër krimit të organizuar dhe krimeve të rënda, kryen një aksion të përbashkët në rajonin e kësaj komune për veprën penale të ‘detyrimit’.
Ky aksion i realizuar në një lokal në Pejë rezultoi me arrestimin e katër personave.
Aksionin e konfirmoi Policia e Kosovës ku thuhet se personat e dyshuar kanë kërkuar para ndaj një personi për shitjen e pronës e cila i ka takuar të pandehurit.
“Të dyshuarit në këtë rast, përmes formave të ndryshme të kanosjes, ia kanë pamundësuar viktimës posedimin dhe shfrytëzimin faktik të pronës së tij. Për ta lejuar viktimën që ta shfrytëzojë pronën e tij të blerë në formë të ligjshme kanë detyruar të njëjtin që të veprojë kundër pasurisë së tij, përkatësisht duke e detyruar të paguajë shumën prej 30.000 mijë euro, në mënyrë që viktimës t’i lejohet posedimi faktik i pronës”
Tëvë1 mëson përmes burimeve se qytetarit i janë kërkuar fillimisht 20 mijë euro, në mënyrë që qytetarit ti mundësohet shitja e pronës, ndërkaq më vonë edhe 30 mijë euro të tjera.
Vlera e pronës kap shifrën 300 mijë euro.
Detaje për aksionin ka dhënë për Tëvë1, prokurori i rastit, Dorjan Juniku.
“Pas pranimit të informacioneve nga sektori i hetimeve të Policisë së Kosovës në Pejë, se një qytetar po detyrohej të paguante shuma të ndryshme të parasë, kundër vullnetit të tij. Ne jemi aktivizuar me sektorin rajonal të hetimeve ku kemi marrë hetimet e para fillestare me qëllim të zbardhjes së kësaj çështje penale”, ka thënë ai.
Prokurori tutje ka dhënë detaje për operacionin.
“Këto dite por edhe sot, kemi realizuar një aksion të madh, ku me këtë rast janë arrestuar katër persona, të cilët dyshohen se kanë kryer veprën penale, detyrimi nga neni 328 paragrafi 2 kodi penal të Republikës së Kosovës, njëri prej tyre, mbajtje në pronësi ose kontrolli, posedim të paatorizuar të armëve. Në këtë aksion ka marrë pjesë edhe drejtoria e hetimeve në Prishtinë nën asistencën e NJRSH-së”, ka thënë Juniku.
Gjatë aksionit janë sekuestruar para dhe armë në shtëpitë e të dyshuarve.
