Autori: Arlind Beqiraj
Është zyrtar i Doganës së Kosovës.
Bashkë me Policinë, Prokurorinë Speciale dhe Administratën Tatimore të Kosovës, po kryejnë kontrolle të detajuara në një pikë të një kompanie të derivateve.
Kontrollet vazhdojnë edhe në 20 lokacione të tjera, përfshirë shtëpitë e nëntë personave të cilët gjatë aksionit edhe u arrestuan.
Që të gjithë nëntë të ndaluarit, dyshohen se janë të përfshirë në shmangie tatimore dhe futje të ujit në vend të naftës në Kosovës.
Për një periudhë të caktuar kohore, në bashkëpunim me një grup të organizuar në Shqipëri, dyshohet se të arrestuarit importuan naftë në Kosovë dhe e kaluan transit për në Shqipëri.
Këtë e bënë për shkak të taksave të larta për naftën në shtetin shqiptar.
Kështu, nafta e destinuar për tregun kosovar u zbraz në Shqipëri dhe u shit në tregun e zi atje, kurse në Kosovë u futën mauna të mbushura me ujë.
Për këtë çështje janë duke u zhvilluar edhe hetime në Shqipëri.
Në njjoftimin e saj, Prokuroria Speciale tregoi se gjatë aksionit u sekuestruan edhe para dhe armë.
“Gjatë kontrolleve janë sekuestruar 15 mijë euro, pesë vetura, pesë autobot për transport të derivateve, dy armë zjarri, 54 fishekë, pajisje elektronike si dhe dokumente të ndryshme relevante për rastin. Po ashtu, janë gjetur edhe 301 euro në kartëmonedha prej 2 eurosh, të cilat dyshohet se janë të falsifikuara”, thuhet në njoftimin e Prokurorisë.
Në realizimin e gjithë këtij krimi ekonomik, sipas Prokurorisë u përdorën dokumente të rreme tatimore e u realizuan transaksione fiktive në tregtinë e derivateve të naftës.
Rastin e sotëm, Shoqata e Naftëtarëve e konsideron si rast të izoluar, duke u distancuar nga të përfshirët.
“Shoqata vlerëson se rastet që aktualisht janë në hetim përbëjnë raste të izoluara dhe nuk përfaqësojnë punën, integritetin dhe profesionalizmin e shumicës së operatorëve të këtij sektori, të cilët ushtrojnë veprimtarinë e tyre në përputhje të plotë me ligjin dhe standardet në fuqi”, ka theksuar Shoqata e Naftëtarëve.
Për arrestimet e sotme, ka reaguar edhe ministri në detyrë i Financave, Hekuran Murati, i cili ka thënë se ekonomia funksionon kur të gjithë veprojnë me rregulla të njëjta.
