Në mëngjesin e së mërkurës ndodhi një aksident i rëndë në mes të dy veturave në udhëkryqin afër konvikteve në Prishtinë.
Si pasojë e këtij aksidenti mbetën të lënduar 6 persona.
Të lënduarit janë dërguar për trajtim në Qendrën Emergjente të Qendrës Klinike Universitare të Kosovës.
Mjeku kujdestar në Qendrën Emergjente të QKUK-së, Avdush Bajgora, tha se dy prej personave të lënduar janë në gjendje të rënduar.
“Në Qendrën Emergjente janë sjellë gjithsej 5 apo 6 pacientë pas një fatkeqësie në trafik e cila ka ndodhur këtu në Prishtinë. Prej atyre pacientëve, dy janë në gjendje të rënduar ndërsa njëri më është dashur që të kryejë tubacionin, është gjendja e rëndë, ka gjakderdhje epidorale, frakturë apo thyerje të sinusit etmoid, ka fraktura multifragmentale, është në gjendje të rënduar. Pacienti është duke u reaminuar dhe sipas të gjitha gjasave do të dërgohet në mjekim intensiv”, tha ai.
Me hetimin e rastit po merret njësiti i trafikut rrugor.
“Sot rreth orës 09:00 kemi pranuar informatën se në udhëkryqin afër konvikteve në Prishtinë , ka ndodhur një aksident trafiku. Në këtë aksident kanë qenë të përfshira, dy automjete të cilat kanë qenë në lëvizje. Si pasojë e aksidentit lëndime trupore kanë pësuar gjashtë persona.”, thonë nga Policia e Kosovës.
E në vendin ku ndodhi aksidenti u larguan veturat prej rrugës me ç’rast u bë edhe pastrimi i kësaj pjese.
