Ani pse mësimdhënësit kishin dalë në punë ashtu, siç u kërkua nga Ministria, në shkollë nuk erdhën nxënësit.
E kjo sipas mësueses së kësaj shkolle, ka ardhur pas një vendimi të Këshillit të Prindërve për të mos i sjellë fëmijët të shtunave.
Por sipas kryetari të këshillit të Prindërve, mësimi të shtunave nuk është zgjidhje dhe se thirrja e Ministrisë është e paarsyeshme.
“Mësimi të shtunave nuk është zgjidhje, vetëm dëm bën. Veç kësaj është mohim i së drejtës së fëmijëve, por edhe prindërve, për pushim në fundjavë. Thirrja e Ministrisë është e paarsyeshme, e pabazuar në efektet dhe vetëm i shërben politikave kozmetike që vazhdimisht i ndërmarrin institucionet tona për arsimin”, tha Jeton Demi nga Këshilli i Prindërve.
Përveç kësaj drejtori i kësaj shkolle, Visar Osmani, nuk e ka të qartë se si do të përfundojë gjysmëvjetori i parë.
E njëjtë si në këtë shkollë u veprua pothuajse në të gjitha shkollat në nivel vendi.
Të dështuar procesin e zëvendësimit të orëve po e quan Sindikata e Bashkuar e Arsimit.
Kryetari i kësaj sindikate, po kërkon bashkëbisedim me Ministren e Arsimit, për gjetjen e një zgjidhjeje.
Ndërsa sipas drejtorit të Institutit Ed-Guard, Rinor Qehaja, mos zëvendësimi i orëve do të ketë pasoja të mëdha tek nxënësit.
Ministria e Arsimit ka ndryshuar kalendarin për vitin e ri shkollor, kjo pas grevës një mujore që u mbajt në shkollat në vend.
Kronika e gazetares Doresa Geci.
