Pas një konfrontimi verbal në një debat televiziv në vitin 2019, i pari i PSD-së Dardan Molliqaj me një bashkëpunëtor, Fatos Sahiti, dhe deputeti i LVV-së, Haki Abazi, u konfrontuan edhe fizikisht.
Shkak i kësaj, të njëjtit janë në proces gjyqësor.
Por që për herë të dytë, shqyrtimi fillestar po dështon të fillojë shkaku i mungesës së të akuzuarve.
Ndaj Dardan Molliqaj, gjykatësja deklaroi se mbetet në fuqi urdhër arresti.
Por, partia e Molliqajt, mohon që atij t’i ketë ardhur ndonjë shkresë nga Gjykata.
“Ftojmë gjykatën të publikojë dëshmi mbi dërgimin e rregullt të ftesave. Mungesa e një dëshmie të tillë, dëshmon qartë se të drejtat e z. Molliqaj i janë cenuar nga lëshimi i këtij urdhërarresti. Gjykata dhe organet e policisë e kanë adresën e saktë të banimit të z. Molliqaj, atë të zyrës së tij të punës dhe të gjitha kontaktet e tij, mirëpo qartazi ata nuk i kanë përdorur ato dhe kanë lëshuar pa asnjë arsye këtë urdhërarrest”, tha Natyra Kuçi nga PSD.
Molliqaj e Sahiti, akuzohen se kanë kryer veprën penale “Sulmi”, vepër kjo e dënueshme me gjobë ose me burgim deri në një vit.
Ndërkaq, i pranishëm në seancën e së mërkurës nuk ishte as Haki Abazi, i cili një ditë më parë kishte njoftuar Gjykatën se nuk mund të vijë për shkak se ndodhet jashtë vendit, me detyrë zyrtare.
Raporti i gazetares, Florijeta Dernjani.
