Për herë të 52-të ka dështuar konstituimi i legjislaturës së nëntë të Kuvendit të Kosovës.
Në seancën e sotme morën pjesë edhe ambasadorët e akredituar në Kosovë.
Seanca dështoi në mungesë kuorumi për votimin e komisionit që mundëson votimin e fshehtë për kryeparlamentar.
Nga 107 deputetë sa ishin të pranishëm në seancë, 54 deputetë votuan për, asnjë kundër dhe asnjë abstenim.
Seanca e radhës do të mbahet nesër në ora 14:00.
Ndryshe, më 19 korrik, lideri i Lëvizjes Vetëvendosje, Albin Kurti dhe ai i Nismës Socialdemokrate, Fatmir Limaj, kanë zhvilluar një takim, në përpjekje për dalje nga kriza. Megjithatë, nga ai takim nuk dolën me ndonjë marrëveshje që do t’i hapte rrugë formimit të institucioneve të reja.
Procesi ka ngecur te zgjedhja e kryetarit të Kuvendit për çka Lëvizja Vetëvendosje, në koalicion me Guxo dhe Alternativa, nuk po arrin t’i sigurojë 61 votat e nevojshme për ta zgjedhur Albulena Haxhiun.
Ata po kërkojnë votim të fshehtë, por kjo, dhe kandidatura e Haxhiut, po kundërshtohen nga partitë e tjera parlamentare.
Thirrje për formim të institucioneve të reja kanë bërë edhe ambasadorë të akredituar në Kosovë si dhe përfaqësues të Bashkimit Evropian.
Ndryshe, Gjykata Kushtetuese ka kthyer të premten më 24 korrik, përgjigje ndaj kërkesave të PDK-së dhe LDK-së mbi vlerësimin e kushtetutshmërisë së vendimit të Kuvendit për votimin e Komisionit për votim të fshehtë të seancës së mbajtur më 29 qershor 2025./teve1.info/
