Takimi i fundit në Bruksel mes Kosovës dhe Serbisë nuk prodhoi asgjë.
Ndërmjetësi Miroslav Lajçak dhe shefi i tij Josep Borrell, nuk arritën t’i ulin në një tavolinë Kurtin dhe Vuçiqin.
Kurti vlerësoi se marrëdhëniet me Serbinë janë abnormale, kurse Vuçiq tha se kryeministri kosovar pati frikë të takohet me të.
E sipas drejtorit të organizatës Aktiv, Miodrag Miliceviq, Kurti dhe Vuçiq po tregohen liderë të papërgjegjshëm, sepse siç thotë ai, ata po e vënë në fokus veten e tyre para qytetarëve.
“Palët sërish dështuan të bëjnë dialog të mirëfilltë në Bruksel. Lëre që dialogu nuk pati sukses por palët nuk arritën as të uleshin së bashku. Në fokus duhet të jenë qytetarët dhe të punohet për të mirën e tyre e jo vëmendja të jetë tek politikanët. Nuk po shoh përgjegjësi dhe llogaridhënie nga asnjëra palë në këtë proces dhe kjo është për keqardhje. Nëse vazhdohet me këtë qasje nuk do të ketë normalizim të marrëdhënieve mes Kosovës dhe Serbisë. Retorika e vrazhdë e dy liderëve fatkeqësisht po ndikon shumë keq tek qytetarët”, tha drejtori Miliceviq.
Skeptik për të ardhmen e këtij procesi po shprehet edhe gazetari, Goran Avramoviq.
Avramoviq thotë se asnjëra palë nuk është e interesuar ta zbatoj marrëveshjen, dhe sipas tij Serbia asnjëherë nuk ka treguar se cili është kompromisi që do ta pranojë në fund.
“Kryeministri i Kosovës, Albin Kurti, në këtë moment, nuk ka kurrfarë interesi politik, që të merr çfarëdo qasje në atë dialog, e jemi dëshmitarë që nga ana tjetër, nga Beogradi, vazhdimisht kemi thirrje për një farë kompromisi, ndonëse sinqerisht duhet ta themi që Beogradi kurrë nuk ka treguar se çka është, çka nënkupton kompromisi në këtë rast. Shkurtimisht, për momentin nga asnjëra palë momentalisht, e as në të ardhmen e afërt, nuk ka gatishmëri politike që të bëjë dialog dhe t’i zbatoj marrëveshjet e Brukselit”, tha Avramoviq.
Marrëveshja për rrugën drejt normalizimit të marrëdhënieve është arritur më 27 shkurt të vitit 2023 në Bruksel dhe Aneksi për zbatimin e saj që është arritur më 18 mars, 2023 në Ohër, por deri më tani asnjëra palë nuk ka bërë hapa konkret drejt zbatimit të marrëveshjeve.