Në gjyqin për vrasjen e Marigona Osmanit, radhën për të dëshmuar e patën mjekët.
Specialisti i mjekësisë emergjente, Burim Maloku, e kishte pranuar trupin e Marigonës 22 gushtin e vitit 2021.
Ai tregoi gjendjen në të cilën ishte ajo.
Pas spitalit të Ferizajt, viktima ishte dërguar në Institutin e Mjekësisë Ligjore, ku ishte konstatuar se vdekja e Marigonës ishte e dhunshme dhe si rrjedhojë e politraumës.
Eksperti mjeko ligjor, Naim Haliti, i cili kreu autopsinë, deklaroi se tek viktima është gjetur një analgjetik që përdoret për ndaljen e dhimbjeve.
Nga Haliti, avokati i familjes kërkoi sqarime rreth thyerjes së eshtrave që ishin konstatuar.
Pyetje për ekspertin mjeko ligjor pati edhe mbrojtja e të akuzuarit, Arbër Sejdiu, rreth analizave toksikologjike, ku ishte konstatuar në organizmin e Marigonës, prezenca e një lloji të drogës.
E trupi gjykues kërkoi informacione se pse në raport të autopsisë nuk është shkruar asnjë fjalë për dhunimin seksual.
Për shkak se ndodhet jashtë vendit, nuk u dëgjua dëshmitari tjetër, të cilin trupi gjykues e cilësoi si shumë të rëndësishëm.
Dy të akuzuarit për vrasjen dhe dhunimin e Marigonës, Dardan Krivaqa dhe Arbër Sejdiu, mohuan fajësinë në daljen e parë të tyre para gjykatës.
Kronika e gazetares Florijeta Dernjani
