Tha se ishte ushtar i Ushtrisë Çlirimtare të Kosovës.
Ndërsa në Hagë, u bë dëshmitari numër 62 i Zyrës së Prokurorit të Specializuar.
Por, ky dëshmitar, tha se nuk ka gjë kundër ish-krerëve të UCK-së, në rastin “Thaçi dhe të tjerët”.
“S’di pse po zgjatni pyetjen. Ma bëri pyetjen ai tjetri. Unë me Kadri Veselin nuk kam kurrgjë. E respektoj. Kam respekt për të. Më vjen keq që ndodhet aty.. Ky s’ka bë kurrgjë. Po i bini shkurt. Nuk kam të bëj kurrgjë as me Kadri Veselin, as me Hashim Thaçin, as me Jakup Krasniqin, as me Rexhep Selimin. Unë kam të bëj [Redaktuar]. Edhe këta [redaktuar] t’i pyesësh e gjykojnë”, ishte shprehur dëshmitari.
Dëshmia e këtij dëshmitari u bë publike me shumë pjesë të redaktuara.
Tutje në dëshmi, dëshmitari numër 62, tha se u arrestua e më pas u keqtrajtua nga anëtarët e UÇK-së, për një periudhë trejavore.
“Dhoma ka qenë 5X5, e shtrume me beton. Aty kam qëndru. Dhe pas tri javëve më kanë dërguar në [redaktuar]. Jam liru për tri ditë atje. Nuk kam qenë i burgosur në [redaktuar] . Kam nejt me ushtarë”, kishte thënë ai.
Ky dëshmitar, tha se u lirua pasi një person, emri i të cilit është redaktuar, i kërkoi Shtabit të Përgjithshëm ta lirojnë.
Ndërsa ka mohuar se e njeh dikë nga ky shtab.
Ndërsa tha se si ushtarëve të UÇK-së, iu ishte ndaluar të vidhnin, të plaçkisnin apo të kryenin krime.
“Po, ne nuk kemi pas kazerma. Kjo u kanë ushtri vullnetare. Nuk të ka detyrua kurrkush të shkosh ushtar, vetëm vullneti yt. Në qoftë se ke dezertuar, atëherë quhesh dezertor. Jo tradhtar, dezertor”, kishte deklaruar dëshmitari i 62-të.
Në dëshminë e tij, dëshmitari numër 62 tha edhe se UÇK nuk kishte polici ushtarake dhe se Shtabi i Përgjithshëm nuk dha leje për ndalimin e tij.
Ndërsa dëshminë e përfundoi në këtë formë.
“Faleminderit prej juve shumë. Dhe çlirimtarëve ju uroj lirim ma të shpejtë”, ishin fjalët e fundit të tij gjatë dëshmisë.
Ndryshe, këtij dëshmitari i ishte ofruar mundësia që t’i heq masat mbrojtëse por ai kishte refuzuar.
