Në gjykimin ndaj Naim Murselit për vrasjen e bashkëshortes së tij, Liridona Ademaj, dëshmitari Valon Lluka ka dhënë detaje rreth komunikimit të tij të parë me të akuzuarin pas ngjarjes.
Lluka, koleg pune i Murselit, u pyet nga prokurorja lidhur me bisedën telefonike që kishte pasur me të akuzuarin pas ngjarjes së rëndë. Ai pranoi se ishte personi i parë që kishte kontaktuar Naimin dhe që kishte marrë vesh për vrasjen.
Prokurorja: “A jeni i vetdijshëm se ju jeni personi i parë me të cilin Naimi ka biseduar pas vrasjes së bashkëshortes së tij?”
Dëshmitari: “Po.”
Lluka tregoi se biseda e parë nuk përmbante shumë detaje dhe se nuk e kishte njohur numrin nga i cili e kishte thirrur Naimi.
Prokurorja: “A ju ka thënë në atë bisedën e parë që bashkëshortja Liridona iu është vrarë?”
Dëshmitari: “Po, ma ka cekë që na kanë gjujtë edhe ajo është vrarë.”
Ai tha se Naimi e kishte kontaktuar fillimisht nga një numër që përfundonte me 417, por që nuk e kishte njohur dhe nuk kishte kthyer thirrjen menjëherë, pasi ndodhej tek fqinjët. Pas kësaj kishte marrë mesazhe urgjente nga numra të ndryshëm, përfshirë një numër që përfundonte me 907.
Dëshmitari: “Më ka shkruar mesazhe ‘Urgjent çele, urgjent. Naimu.’ Pastaj ‘O Valon, na kanë vra’ dhe në fund ‘Thirr’.”
Ai tha se kishte bërë screenshot mesazheve dhe ia kishte dërguar Naimit në numrin e tij privat në WhatsApp, por fjalët nuk kishin shkuar.
Lluka po ashtu tha se numri nga i cili e kishte kontaktuar Naimi ishte numër i firmës, i cili më pas ishte ç’aktivizuar.
Prokurorja: “Telefoni a ka qenë i firmës apo personal?”
Dëshmitari: “I Naimit, por numri i firmës.”
Pas bisedës, Lluka tha se kishte marrë makinën e një komshiu dhe kishte shkuar në vendin e ngjarjes, por policia nuk i kishte lejuar të afrohej.
Dëshmitari: “Kur jemi afru aty kanë qenë policë dhe s’kanë lejuar me afru. I kam pyetur a ka vdekur dikush, por askush nuk është përgjigjur dhe jam larguar.”
Më vonë, një polic e kishte kontaktuar duke i thënë se Naimi dhe fëmijët ishin mirë, një lajm i dhënë nga vetë i akuzuari.
Në stacionin e Policisë, Lluka mori lajmërimin se Liridona kishte ndërruar jetë dhe e kishte ngushëlluar familjen.
Dëshmitari: “Isha në zyrë me Naimin dhe e ngushëllova. Më pas erdhi prokurorja dhe më kërkoi të largohesha.”
Avokati i familjes së Liridonës e pyeti dëshmitarin edhe për detaje të tjera lidhur me Naimin, përfshirë blerjen e një shtëpie në fshatin Bernicë dhe kërkesën e tij për rrogë avans prej 1000 euro.
Dëshmitari: “Po, është e vërtetë që ka blerë shtëpi në Bernicë dhe ka kërkuar avans rroge prej 1000 euro.”
