Prezenca e ish-ndihmëssekretarit amerikan të Shtetit në Hagë, James Rubin, për të dëshmuar për Thaçin edhe të tjerët ka marrë vëmendje të madhe ndërkombëtare.
Rubin është në mesin e dëshmitarëve të thirrur nga mbrojtja.
Dy gjigantët mediatik, Associated Press dhe Reuters i kanë kushtuar vëmendje diplomatik amerikan i cili mes tjerash ka deklaruar se nuk ka pasur asnjë të dhënë apo provë që Hashim Thaçin dhe Jakup Krasniqin e lidhin me vrasje dhe ekzekutime.
“Rubin ishte me ish-Sekretaren e Shtetit të SHBA-së, Madeleine Albright, në bisedimet e paqes në Francë në vitin 1999 dhe më vonë ishte i pranishëm në negociatat për çarmatosjen e Ushtrisë Çlirimtare të Kosovës, e njohur edhe si UÇK. Ai e përshkroi Thaçin si një “njeri të parë” politik për këtë forcë, pa pushtet të vërtetë” – ka shkruajtuar Associated Press.
E Reutersi, në artikullin që mbante titullin “Thaçi s’kishte kontroll mbi UÇK-në” zbardhi deklaratën e amerikanit që dikur mbante goxha pozitë të lartë në shtëpinë e bardhë.
Paraqitjen e Rubin në Hagë e ka komentuar edhe ministrja e jashtme e Shqipërisë, Elisa Spiropali.
Në një postim në rrjetin social facebook, Spiropali tha paraqitja e provave dhe dëshmive të mbrojtjes do të largojë përfundimisht njollat e fantazisë mbi emrin e UÇK-së, drejtësia duhet ta mundë njëherë e mirë padrejtësinë.
Rubin kishte njoftuar më herët se do ishte në Hagë në cilësinë e dëshmitarit para dhomave të specializuara të Kosovës.
Në një podcast për për gazetaren e njohur, Christian Amanpour, Rubin tha se ka shumëçka për të folur në lidhje më zhvillimet në Kosovë përgjatë luftës.
Përveç Rubin, ishin edhe dy zyrtarë të Departamentit amerikan të Shtetit të pranishëm në gjykatore.
Ndryshe, James Rubin është njëri nga 11 dëshmitarët e ftuar nga Thaçi për të rrëfyer në gjykatore për ngjarjet e luftës së UÇK-së.
