Drejtori për Siguri dhe Emergjenca në Komunën e Prishtinës, Lulëzim Fushtica, thotë se çatia e ndërtesës së kryeqytetit, në lagjen “Arbëria” ka rënë si pasojë e erërave të forta që kanë mbizotëruar pasditen e sotme në Kosovë.
Si pasojë e materialeve të rënda që kanë rënë nga çatia është goditur një grua, gjendja e së cilës nga Klinika Emergjente kanë thënë se është stabile, por e rëndë.
Fushtica tha se në momentin kur ka ndodhur ngjarja, nuk ka qenë duke u zhvilluar asnjë punim në kulm.
“Në momentin kur ka ndodhur ngjarja, nuk ka qenë duke u zhvilluar asnjë punim në kulm – informatat që i kemi ne… këto duhet të ia lëmë në dorë prokurorisë dhe policisë, ku do të dalin me deklaratë zyrtare por indikacionet e para janë dhe sipas të gjitha gjasave prapë po them pa dashur të predikoj rasti ka ndodhur si pasojë e erërave të forta që kanë ndodhur në atë moment në kryeqytet”, tha ai në emisionin “Ditari” në Tëvë1.
Gjithashtu, ai njoftoi se ndërtesa kryesore e Komunës së Re nuk do të ofrojë asnjë shërbim deri ditën e hënë.
“Deri më tani ishim në vendin e ngjarjes, e kemi bërë pastrimin e vendit të ngjarjes. Rruga është e bllokuar dhe ndërtesa kryesore e Komunës së Re është e mbyllur deri të hënën pra nuk do të ofrojë asnjë shërbim.
Ai tha se ekipet relevante qysh nga nesër do të nisin riparimin dhe eliminimin e çdo rreziku që mund të ketë pjesa e kulmit që ka mbetur aty.
“Do të evidentohen edhe dëmet e shkaktuara, me ç’rast janë dëmtuar edhe disa vetura të cilat kanë qenë të parkuara aty. Nuk mund ta dimë ende vlerën e dëmeve, është shumë herët”, tha Fushtica.
Ndërkohë, Policia e Kosovës ka njoftuar se kanë nisur punën për zbardhjen e plotë të të gjitha rrethanave që karakterizojnë ngjarjen.
Ndërkaq edhe nga Prokuroria Themelore e Kosovës është konfirmuar se kanë nisur hetimet se si ka rënë kulmi./teve1.info/
