Sipas të dhënave të përditësuara nga Komisioni Qendror i Zgjedhjeve (KQZ), në Prishtinë, deri në këtë orë kanë votuar 78 mijë e 278 qytetarë, nga gjithsej 222 mijë e 418 sa janë të regjistruar në listën e votuesve.
Nga 268 vendvotime, janë procesuar 264, që përfaqësojnë 98.51 për qind të të gjitha vendvotimeve në territorin e Komunës së Prishtinës.
Ndërkohë, në Mitrovicën e Jugut, të dhënat e përditësuara tregojnë se kanë votuar 29 mijë e 971 qytetarë, nga gjithsej 84 mijë e 715 sa janë të regjistruar në listën e votuesve.
Në këtë komunë janë procesuar 104 vendvotime, që përbëjnë 99.05 për qind të të gjitha vendvotimeve në territorin e Mitrovicës së Jugut.
Zyrtarë të KQZ-së kanë bërë të ditur se procesi zgjedhor po zhvillohet qetë dhe pa ndonjë incident të raportuar.
“Deri më tani nuk është raportuar asnjë problem gjatë procesit të votimit. Pritet që në orët e fundit para mbylljes të ketë një rritje të pjesëmarrjes,” thuhet në njoftimin e KQZ-së.
Institucioni zgjedhor do të vazhdojë me përditësimet periodike për pjesëmarrjen dhe më pas me publikimin e rezultateve preliminare të raundit të dytë për kryetar të Komunës së Prishtinës.
Të gjitha të dhënat mund të ndiqen në platformën zyrtare të Komisionit Qendror të Zgjedhjeve.
