Prokuroria Speciale e Republikës së Kosovës ka dorëzuar aktakuzë në Gjykatën Themelore në Prishtinë ndaj të pandehurit N.L., për veprën penale “Kontrabandim me migrantë”.
Sipas aktakuzës, nga një kohë e pacaktuar deri më 23 prill 2021, në Prishtinë, N.L., në bashkëkryerje me të akuzuarit F.K., F.K., B.B., B.S. dhe Xh.K., dyshohet se ka kryer veprën penale për të cilën akuzohet, me qëllim të sigurimit të përfitimit financiar të kundërligjshëm.
Sipas Prokurorisë Speciale, N.L. dyshohet se ka pasur rol edhe në prodhimin e dokumenteve personale të falsifikuara, të cilat më pas u janë siguruar personave që synonin të migronin në vende të ndryshme të Evropës.
Aktakuza pretendon se i pandehuri, në bashkëkryerje me personat e tjerë të akuzuar, ka siguruar persona brenda dhe jashtë territorit të Republikës së Kosovës, të cilët kishin për qëllim migrimin nëpër vende të ndryshme evropiane.
Po ashtu, sipas aktakuzës, qytetarët janë pajisur me dokumente të falsifikuara, të cilat N.L. dyshohet se ua ka dërguar fizikisht ose përmes shërbimeve postare, në këmbim të shumave të ndryshme të parave.
Sipas Prokurorisë, shumat e paguara për këto dokumente kanë arritur deri në 5 mijë euro.
I pandehuri N.L. aktualisht ndodhet në paraburgim./teve1.info/
