Ajo ia ka përkujtuar faktin se Republika e Kosovës është formuar në procesin e shpërbërjes së ish-Jugosllavisë, sikurse Kroacia.
“Është e rëndësishme të theksohet se sipas Kushtetutës së RSFJ-së, Krahina Socialiste Autonome e Kosovës nuk ishte vetëm një krahinë brenda Republikës Socialiste të Serbisë, por edhe një element kushtetues i federatës. Edhe përfaqësuesi i Kosovës, Sinan Hasani, gjatë një viti si kryetar i Kryesisë ka kryer detyrën nominale të kreut të shtetit”, ka shkruar ajo.
Deputetja shqiptare tha se “themelet e pavarësisë së Kosovës janë të njëjtat që çuan në pavarësi të Kroacisë”.
Tutje Lekaj Prlaskaj ia ka rikujtuar Milanoviqit se autonomia iu hoq Kosovës me dhunë, teksa atje u ushtrua regjim policor dhe persekutim masiv i popullsisë shumicë shqiptare
“E gjithë kjo, për shkak të rrezikut të një fatkeqësie të afërt dhe shkeljes së dispozitave të së drejtës ndërkombëtare humanitare, ka çuar në një ndërhyrje humanitare, e cila është e njohur në marrëdhëniet ndërkombëtare, veçanërisht në Evropën Juglindore. Prandaj, të sfidosh shtetësinë e Kosovës do të ishte si të sfidosh shtetësinë e Greqisë moderne (e cila u themelua në vitet 1830) ose të Bullgarisë (format e para të shtetësisë moderne të së cilës u njohën në 1878. g)”, ka shkruar ajo.
