Deputetja e PDK-së, Ariana Musliu-Shoshi ka folur për një konferencë e cila është organizuar në nderim të diasporës.
Sipas saj, kjo konferencë u organizua në këtë kohë e jo verës sepse mërgata është e zhgënjyer me Qeverinë Kurti.
“”Diaspora Flet” ishte titulli i konferencës që Germin e organizoi për 3 ditë. U përfol se do të jetë konferenca më e madhe e diasporës shqiptare. Ndërsa pas kësaj konference, heshtje. A thua pse? Sepse diaspora vërtetë foli! Ajo diasporë që me shumicë i votoi për t’i sjellë në krye të institucioneve, ka parë paaftësinë e kësaj klase qeverisëse e janë dëshpëruar totalisht nga këta. Prandaj edhe u organizua tani e jo gjatë verës kur diaspora është në Kosovë”, ka shkruar Musliu-Shoshi.
Tutje ligjvënësja ka shkruar se kjo Qeveri ia ka pamundësuar diasporës shërbimet bazike, siç është pajisja me pasaporta, e madje as nuk ia ka sjellë në kuvend as Ligjin për Diasporën.
“Ndërkohë, e kanë gojën plotë për kthimin e mërgatës. Me këtë ritëm të qeverisjes, jo kthim të mërgatës, por druaj do të ketë dyfishim të saj nga viti tjetër. Në dy vite, kjo klasë qeverisëse e ka mbytur edhe atë pak shpresë që qytetarët e këtij vendi kanë pasur, e tash një nga një, të gjithë po i braktisin”, ka shkruar ajo.
