Kryetarja e Komisionit për Politikë të Jashtme në Parlamentin Britanik, Alicia Kearns, ka komentuar situatën në veri të Kosovës.
Ajo tha se militantët e armatosur serbë minojnë stabilitetin e Kosovës.
“Aktorët ndërkombëtarë duhet të ndalojnë para se të sulmojnë zyrtarët e zgjedhur në mënyrë demokratike që marrin zyrat e tyre në veri të Kosovës. Jo më pak kur ata qëndrojnë të heshtur dhe nuk arrijnë të thërrasin militantët e mbështetur dhe të armatosur serb, të cilët vazhdojnë të minojnë stabilitetin në veri të Kosovës”, ka shkruar ajo.
International actors should pause before attacking democratically elected officials taking up their offices in Northern Kosovo.
Not least when they stay silent on and fail to call out Serbian backed and armed milita who continue to undermine stability in the north of Kosovo.
— Alicia Kearns MP (@aliciakearns) May 26, 2023
Për dallim nga Kearns zyrtarët e BE-së dhe SHBA-së dhe Gjermanisë kanë thënë se dënojnë “veprimet e vazhdueshme të autoriteteve kosovare për të hyrë në ndërtesat komunale në veri të Kosovës”.
Ambasadori amerikan, Jeff Hovenier ka thënë se masat e sotme të dhunshme duhet të ndërpriten menjëherë. Ai po ashtu ka deklaruar se SHBA-ja dënon “veprimet e vazhdueshme të autoriteteve kosovare për të hyrë në ndërtesat komunale në veri të Kosovës”.
Edhe Bashkimi Evropian ka dënuar fuqishëm situatën e krijuar në veri të vendit, teksa kanë bërë të ditur se nuk do pranojnë asnjë veprim të mëtejshëm të njëanshëm dhe provokues.
Gjermania është pajtuar me reagimin e Shteteve të Bashkuara të Amerikës, lidhur me situatën e krijuar sot në veri të vendit.
Ambasadori gjerman në Kosovë, Jorn Rohde thotë se u bëjnë thirrje autoriteteve kosovare të punojnë ngushtë me NATO-n, KFOR-in dhe EULEX-in.
”Plotësisht dakord. U bëjmë thirrje të gjithëve që të përmbahen nga përshkallëzimi, u bëjmë thirrje autoriteteve kosovare që të punojnë ngushtë me të NATO, KFOR dhe EULEX”, ka shkruar ai në Twitter.
Teksa, presidentja e vendit, Vjosa Osmani ka thënë se veprimet e Policisë së Kosovës ndaj strukturave ilegale në veri janë legjitime.
Situata në veri është tensionuar që nga mesdita e sotme, si shenjë pakënaqësie nga serbët lokal pas betimit që kanë bërë dje kryetarët e komunave në Leposaviq, Zubin Potok, dhe Zveçan.
Në këto protesta janë lënduar pesë pjesëtarë të Policisë së Kosovës, derisa janë dëmtuar 4 vetura. /Teve1.info/
